Sobri nos
Nu ta prende, nu ta kria, nu ta partilha.
Na Kabu Verdi ka ta falta talentu. Ta falta materia na un lingua ki genti ta papia di verdadi. Skola.dev nase di kel falta.
Algen ta prendi midjor na se lingua maternu — kel-li é un konvisan, é ka un detalhi. Nu ta insiná na Kriolu i nu ta dexa termus tekniku na Ingles — Loop, Array, Container — pa bu prendi sen bareras, ma sai preparadu pa mundu.
Skrebe teknolojia na Kriolu tanbe é un manera di guarda nos lingua. Kada lisan é konteudu nobu na Kriolu, pa gosi i pa jerasan ki ta ben.
Tudu sta abértu na org @deznode(ta abri nun nova aba), baxu lisénsa MIT: plataforma na skola.dev i lisans na skola-content. Pa gosi é mi so, ta kria na abértu, inda sen otu kontribuidor — kuandu kel-la muda, kel pájina li ta muda tanbe.
Pamodi Kriolu
Kriolu é ka un lingua simplifikadu, i é ka un sigundu opsan. É nos identidadi más forti — lingua ki tudu ilha i tudu diáspora ta pensa na el. Insiná engenharia na Kriolu é ka un favor pa ken ki ka sabe Ingles. É un manera di mostra ki nos lingua pode leba kualker kuza.
Kel ki N kre é ki es plataforma txiga na tudu kabuverdianu, na kada ilha i na diáspora, i ki el djuda transforma nos tera ku teknolojia. Jerasan nobu primeru — ken ki ten 16 anu gosi debe pode prende kria software sen ten ki prende lingua di otu algen. Skola.dev inda é ka kel-li. Ma é pa kel-li ki el sta li.
Pamodi prende programa inda é importanti
Ten un pergunta importanti: pamodi ki N debe prende programa, si AI ta skrebe kódiku? Resposta eradu é fla ki bu ka debe. Prende pensa ku lójika, intende kuzé ki é verdadi, konstrui un sistema i intende pamodi ki el ta funsiona — nada di kel-la ka ta dexa di ten valor pamodi un komputador pode imita-l. AI ta aumenta kel ki dja bu sabe faze. El ka ta kria kel kapasidadi dentu di bo.
Risku verdaderu é otu, i el é más silensiozo. Si AI skrebe txeu di bu testu, un dia bu ka ta konsigi skrebe nen un. Si el skrebe txeu di bu kódiku, un dia bu ka ta konsigi faze kel eskolha di arkitetura ki éra parti ki ten valor. Ningen ka ta anunsia kel momentu kuandu el ta txiga.
Nton uza-l. Ma fika atentu si bu sta ta kresi djuntu ku el o si bu sta ta fika vaziu. Kaba rapidu ka ten más valor ki kresi. Úniku kuza ki el ka pode faze pa bo é intende — i bu ta intende más rapidu na lingua ki bu ta pensa na.